مسادير

مسادير
-----------
أمبارح بعد كل الخلوق ما هجعو
عاود قلبي ضرباتو المطولة وجعو
ود الشيخ مفارقة العريب النجعو
ما ببقولنا ذي الودعونا ورجعو
----------
ريدن من قديم أنا كت مسيهو لباسي
وإنت الليلة أصبح تركو عندك قاسي
كل ما تهف ليك نايرة أم كلاماً راسي
نقراتك تزيد وانا دوب كتر هلواسي
------------
كيف أصبحت يا الشتلة الكريفك رندي
وكيف قيّلتي يا النايرة الخديدك بندي
وكيف أمسيتي يا الشاطبة العقيل العندي
وكيف بيّتي يا الملكة البلودك شندي
-------------
وصل أب رحمة والشقلة الوعرها يخوّف
أمسى الليلة لي جمع الفروق متشوّف
نده شيخ الطريقة وجملة المتصوف
يجمعو شملي بي المن الدنات متعوّف
-------------
سبب قلبي الرجع للغي بعد ما يقن
عيونا وجيدا دعّات اللرايل الشقن
المهر الصهل سمع النقاقير دقن
يكسر من جمال تابره أم لهايبن بقن
-------------
البارح بشوف بشلع بريق النو
وحس رعادو يجرح في الضمير كوكو
داك طير القطا دوّر مشارع الهو
وفرقان البطانة أتماسكن من ضو
--------------
ليل الغمة هوّد والبروق إتلالن
دموع الوجعة جن ذي السحابات شالن
ملن قرب العيون لكنهن ما سالن
مو من قلهن بس في الوجه ما خالن
-----------------
عهدنا معاك كنداب حربة ما بتشلخ
وصرة عين جبل بصاقعة ما بتتفلخ
كان إيدينا فيك من المسك تتملخ
السما إنتكي وجلد النمل يتسلخ
-------------
كيف أهنا وأعيش وأنا صبري ولى مودع
وسببي الرخرخ المن قام صغير متفدع
جنيت وجني جنّ وحالي أمسى مبدع
أهج شقيش أهج فاضلي تاني أجدع